وزير الشباب :يكرم بيج رامي في احتفال علي سفح الهرم

وزارة الشباب والرياضة نظمت مؤتمر صحفي عالمي تحت سفح الأهرامات وبالتعاون مع اتحاد كمال الأجسام والشركة الراعية لـ البطل "بيج رامي" لتكريمه على إنجازه بحصوله على لقب مستر أولمبيا 2020.. 

الوزير د."أشرف صبحي" أشاد بالبطل المصري اللي كان حديث العالم كله خلال الأيام التلاتة اللي فاتت، وقال إن إنجازه تواصل لسلسلة الإنجازات اللي بتحققها الرياضة المصرية خلال 2020 وفي كل البطولات العربية والقارية والدولية في كل الألعاب.. الوزير كمان أشاد بطموح وعزيمة "بيج رامي" خصوصاً إنه كان لسه خارج من أزمة الإصابة بفيروس كورونا في أكتوبر اللي فات وقبل مشاركته في البطولة لكن إصراره إنه يتجاوزها كان دافع إنه يحقق إنجازه.. 

رئيس الشركة الراعية لبطلنا قال في كلمته إن الوزير د."أشرف صبحي" كان بيتابع "رامي" بشكل مستمر واتصل بيه قبل السفر للمشاركة في البطولة ودعمه وده كان له أثر إيجابي كبير عليه ورفع من معنوياته.. 

"بيج رامي" في كلمته أكد إن أهم حاجة في حياة أى إنسان هو "النجاح"، وهو المحرك لكل خطواته، وشكر الجمهور المصري اللي حس منه بالدعم من قبل البطولة وأثناءها ولغاية رجوعه لمصر.. 

بالمناسبة.. كان برضه فيه لفتة جميلة من الشركة الوطنية مصر للطيران مع "بيج رامي" لما وصل من نيويورك، وهو في الطيارة من العاملين في الشركة سواء طاقم الضيافة أو حتى لما وصل لأرض مصر وكانوا في استقباله بالورود وعلى رأسهم المحاسب مجدي إسحق رئيس شركة ميناء القاهرة الجوي، والطيار حسن منير مساعد رئيس مجلس إدارة شركة مصر للطيران للخطوط الجوية نائب عن الطيار عمرو أبوالعنيين رئيس شركة مصر للطيران للخطوط الجوية.. 

أفضل هدية ممكن يحصل عليها أى شخص ناجح هي "التقدير".. ولما بيكون من بلدك الوضع بيختلف.. بلدنا جميلة بأهلها ومؤسساتها.. مرة تانية ومليون مبروك لـ "بيج رامي".

#بالعامية_المصرية